ຫົວໜ້າ ພະແນກ ວຕ ແຂວງຄຳມ່ວນ ລົງຊຸກຍູ້ວຽກງານ 3 ສ້າງຢູ່ບ້ານທົ່ງຂາມ

ທງຂາມໃນ​ວັນ​ທີ 8 ພະຈິກ 2016 ຫົວໜ້າ ພະ​ແນ​ກ ວິທະຍາສາດ ​ແລະ ​ເຕັກ​ໂນ​ໂລ​ຊີ​ແຂວງ​ຄຳ​ມ່ວນ ພ້ອມ​ດ້ວຍ​ຄະນະລົງ​ຊຸກຍູ້​ວຽກງານ 3 ສ້າງ​ຢູ່​ບ້ານທົ່ງ​ຂາມ​ເມືອງບົວລະພາ. ກອງ​ປະຊຸມ​ດັ່ງກ່າວ​ໄດ້​ຈັດ​ຂຶ້ນ​ທີ​ຫ້ອງການ​ບ້ານໆທົ່ງ​ຂາມ ​ໂດຍ​ການ​ເປັນ​ປະທານຂອງ​ທ່ານ ນ ​ໄພບູນ ​ໄຊ​ຍະ​ກຸມ ຫົວໜ້າ ພະ​ແນ​ກ ວິທະຍາສາດ ​ແລະ ​ເຕັກ​ໂນ​ໂລ​ຊີ​ແຂວງ​ຄຳ​ມ່ວນ ສົມທົບ​ກັບ​ຫ້ອງການ ວິທະຍາສາດ ​ແລະ ​ເຕັກ​ໂນ​ໂລ​ຊີ​ເມືອງ​ບົວລະພາ ມີນາຍ ບ້ານໆທົ່ງ​ຂາມ, ຫົວໜ້າໜ່ວຍ ​ແລະ ພໍ່​ແມ່​ປະຊາຊົນ​ບ້ານ​ດັ່ງກ່າວ​ເຂົ້າ​ຮ່ວມ​ຢ່າງ​ພ້ອມພຽງ. ​ຈຸດ​ປະສົງ​ໃນ​ການ​ລົງ​ເຄື່ອ​ນ​ໄຫວວຽກງານ 3 ສ້າງ​ໃນ​ຄັ້ງ​ນີ້ ​ກໍ່​ເພື່ອ​ຊຸກຍູ້​ໃຫ້​ປະຊາຊົນ​ພາຍ​ໃນ​ບ້ານ

​ທົ່ງ​ຂາມ​ປູກ​ຊາ (​ແຈ) ​ແບບ​ທຳ​ມະ​ຊາດ​ເປັນ​ຊາ​ຫຼຸດ​ໄຂມັນ, ຫຼຸດ​ນ້ຳໜັກ ທີມີ​ຄຸນ​ນະພາ​ບ ​ເປັນ​ຜະລິດ​ຕະພັນ​ຂອງ​ບ້ານ ສາມາດ​ສ້າງ​ລາຍ​ຮັບ​ໃນ​ຄອບຄົວ. ຊາ​ຊະນິດ​ນີ້​ມີ​ຕົ້ນ​ກຳ​ເນີ​ດທີ​ບ້ານ​ທົ່ງ​ຂາມ​ ປະຊາຊົນ​ປູກ​ຕາມ​ຕີນ​ພູ, ​ເນີນ​ພູ ບ່ອນ​ທີ​ມີ​ອາກາດ​ຊຸ່ມ​ເຢັນ. ຊຸກຍູ້ ​​ແລະ ສົ່ງ​ເສີມໃຫ້​ພໍ່​ແມ່​ປະຊາຊົນ​ປູກ​ເພື່ອຈຳໜ່າຍ​ເປັນ​ສິນຄ້າ.​ໃນ​ກອງ​ປະຊຸມ ທ່ານ ຄຳ​ຕາ ຟ້າ​ສະ​ຫ່ວາງ ຫົວໜ້າ ຫ້ອງການວິທະຍາສາດ ​ແລະ ​ເຕັກ​ໂນ​ໂລ​ຊີ ​ເມືອງ​ບົວລະພາ ​ໄດ້​ລາຍ​ງານສະພາບ​ລວມຂອງ​ຫ້ອງການ ​ໃນ 1 ປີ ທີ່​ໄດ້​ເຄືອ​ນ​ໄຫວ​ວຽກງານຜ່ານມາ ສາມາດ​ສະຫຼຸບ​ໄດ້​ດັ່ງ​ນີ້​: ລົງ​ກວດ​ຊິງ​ຊັ່ງ​ທົ່ວ​ໄປ​ທັງໜົດ 48 ໜ່ວຍ, ຂະໜາດ 100 kg ຈຳນວນ 2 ໜ່ວຍ, ຂະໜາດ 30 kg ຈຳນວນ 7 ໜ່ວຍ, ຂະໜາດ 15 kg ຈຳນວນ 24 ໜ່ວຍ, ຂະໜາດ 5 kg ຈຳນວນ 15 ໜ່ວຍ. ລົງ​ກວດ​ບໍລິ​ມາດ​ນ້ຳມັນ​ຊະນິດ​ປ້ຳ​ອິ້ວ ​ໃນ​ຕົວ​ເມືອງມີ 4 ປໍ້າ​ອິ້ວ ມີປ້ຳ​ນ້ຳມັນ​ໃຫຍ່​ໃນ​ເທດສະບານ 2 ປ້ຳ ແລະ ​ເຂດ​ຈຸດ​ສຸມຫຼັງຄັງ 2 ປ້ຳ ລວມທັງໜົດ 4 ປ້ຳ ມີ 10 ​ຕູ້ ມີ 18 ຫົວ​ຈ່າຍ. ລົງ​ເຄືອ​ນ​ໄຫວ​ກວດກາ​ສິນຄ້າໝົດອາຍຸ ​ແລະ ​ເຄື່ອງ​ສຳ​ອາງ​ທີ​ຕ້ອງ​ຫ້າມ, ​ເຄື່ອງ​ທີ່ບໍ່​ໄດ້​ເສຍ​ພາສີ​ອາກອນ​ນຳ​ເຂົ້າ​ມາ​ຈາກ​ຕ່າງປະ​ເທດ​ທີ​ມາ​ຈຳໜ່າຍ. ​ໄດ້​ລົງ​ກວດ​ໃນ​ໄລຍະ 9 ​ເດືອນ ລົງ 2 ຄັ້ງ ຈຳນວນ 24 ຮ້ານ ພົບ​ເຫັນ​ເຄື່ອງ​ທີ່​ເສຍ​ຄຸນ​ຈຳນວນ 20 ຮ້ານ, ລວມທັງໜົດ 8 ຜະ​ຜິດ​ຕະພັນ ມີ 52 ລາຍການ ຄິດ​ເປັນ​ມູນ​ຄ່າ​ທັງໜົດ 4.289.000 ກີບ. ສິນຄ້າ​ດັ່ງ​ກ່າວ​ໄດ້​ນຳ​ໄປ​ເກັບ​ໄວ້​ທີ່​ຫ້ອງການ ອຸດສາຫະກຳ ​ແລະ ການ​ຄ້າ​ເມືອງ​ບົວລະພາ ​ເພື່ອ​ຈະ​ໄດ້​ນຳ​ໄປ​ທຳລາຍ​ຖີ້ມ. ພາຍຫຼັງຫົວໜ້າຫ້ອງການ ວິທະຍາສາດ ​ແລະ ​ເຕັກ​ໂນ​ໂລ​ຊີ​ເມືອງ​ບົວລະພາ​ລາຍ​ງານສຳ​ເລັດ​ແລ້ວ ນາຍບ້ານໆທົ່ງ​ຂາມ​ລາຍ​ງານ​ສະພາບ​ລວມຂອງ​ບ້ານ ເຊິ່ງບ້ານ​ດັ່ງ​ກ່າວ ເປັນ​​ບ້ານໜຶ່ງຂອງ​ເມືອງ​ບົວລະພາ​ທີ​ຖືກ​ຈັດ​ເປັນ​ບ້ານ​ທົດ​ລອງ 3 ສ້າງ ​ໂດຍ​ແມ່ນ​ການ​ເຕົ້າ​ໂຮມ 5​ ບ້ານ ​ເຂົ້າ​ເປັນ​ບ້ານ​ທົ່ງ​ຂາມ. ບ້ານ​ທົ່ງ​ຂາມມີ 5 ຄຸ້ມ, ມີ 428 ຫຼັງຄາ​ເຮືອນ, ມີ 359 ຄອບຄົວ, ມີ 20 ໜ່ວຍ, ມີ​ພົນລະ​ເມືອງ​ທັງໜົດ 2.124 ຄົນ, ຍິງ 1.192 ຄົນ, ມີ 1 ຊົນ​ເຜົ່າ ​ຄືຊົນ​ເຜົ່າ​ມະ​ກອງ ນັບຖື​ສາດສະໜາພຸດ. ມີ​ເນື້ອ​ທີ​ທັງໜົດ 8885.636 ​ເຮັກຕາ, ​ເນື້ອ​ທີ​ປູ​ກຝັງ 808.33 ​ເຮັກຕາ, ອາຊີບ​ຕົ້ນຕໍ່​ແມ່ນ​ການ​ເຮັດ​ນາ ​ແລະ ອາຊີບ​ສຳຮອງ​ແມ່ນ​ປູກຝັງ-ລ້ຽງສັດ ​ເຊິ່ງ​ເປັນ​ເງື່ອນ​ໄຂ​ໃນ​ການ​ພັດທະນາ​ຄອບຄົວ​ເຮືອນ​ຊານ ໃຫ້​ຫຼຸດພົ້ນ​ອອກ​ຈາກ​ຄວາມ ທຸກ​ຍາກ​ໃນຕໍ່ໜ້າ.