ຫ້ອງກວດສອບຄຸນນະພາບນ້ຳມັນເຊື້ອໄຟປະຈຳດ່ານສາກົນຂົວມິດຕະພາບ III ຄຳມ່ວນ - ນະຄອນພະນົມໄດ້ເປີດນຳໃຊ້ບໍລິການແລ້ວ

 

IMG 8970ພິທີເປີດການນຳໃຊ້ ຫ້ອງກວດສອບຄຸນນະພາບນ້ຳມັນ ເຊື້ອໄຟ ປະຈຳດ່ານສາກົນຂົວມິດຕະພາບ III ຄຳມ່ວນ - ນະຄອນພະນົມ ໄດ້ຈັດຂຶ້ນຢ່າງເປັນທາງການໃນວັນທີ 24 ຕຸລາ 2016 ນີ້ ຢູ່ທີ່ຫ້ອງການປະຈຳຂົວມິດຕະພາບດັ່ງກ່າວ ໂດຍການເປັນກຽດເຂົ້າຮ່ວມຕັດແຖບຜ້າ ເພື່ອເປັນ ສິລິມຸງ ຄຸນ ໂດຍ ທ່ານ ໂອໄດ ສຸດາພອນ ເຈົ້າແຂວງໆ ຄຳມ່ວນ ແລະ ທ່ານ ບັນດິດ ສຈ ບໍ່ວຽງຄຳ ວົງດາລາ ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ,​ ມີບັນດາຫົວໜ້າຫ້ອງການ, ຫົວໜ້າກົມ,

ສະຖາບັນມາຈາກກະຊວງວິທະຍາສາດ ແລະ ເຕັກໂນໂລຊີ, ພະແນກການ, ​ບໍລິສັດ ແລະ ສື່ມວນຊົນທຸກຂະແໜງການ ທັງສູນກາງ ແລະ ທ້ອງຖິ່ນເຂົ້າຮ່ວມ.

          ຫ້ອງການກວດກາຄຸນນະພາບນ້ຳມັນເຊື້ອໄຟປະຈຳດ່ານຂົວມິດຕະພາບ III ແຫ່ງນີ້ ປະກອບມີຫ້ອງທົດລອງ ໃນການກວດຄຸນນະພາບນ້ຳມັນເຊື້ອໄຟ ນຳເຂົ້າ - ສົ່ງອອກ ແລະ ຈຳໜ່າຍຢູ່ ສປປ ລາວ,​ ສຳລັບຂັ້ນຕອນການກວດສອບ ແມ່ນມີດັ່ງນີ້: ເມື່ອມີການນຳນ້ຳມັນ ເຊື້ອໄຟເຂົ້າມາ ຈະຕ້ອງໄດ້ມາແຈ້ງເອກະສານນຳເຂົ້າ,​ ເກັບຕົວຢ່າງຈາກລົດບັນທຸກ ນ້ຳມັນເຊື້ອໄຟເພື່ອກວດຄຸນນະພາບເບື້ອງຕົ້ນຢູ່ດ່ານນຳເຂົ້າ ເພື່ອກວດກາຄຸນນະພາບ ຢູ່ຫ້ອງທົດລອງປະຈຳດ່ານ, ອອກໃບຢັ້ງຢືນຄວາມຖືກຕ້ອງຂອງຄຸນນະພາບນ້ຳມັນເຊື້ອໄຟ ຫລັງຈາກນັ້ນຈິ່ງນຳເອົາໃບຢັ້ງຢືນ ພ້ອມກັບຊຸດເອກະສານສົ່ງໄປຫ້ອງການພາສີ, ພ້ອມນິ້ ຍັງຈະໄດ້ດຳເນີນການກວດກາຄຸນນະພາບນ້ຳມັນເຊື້ອໄຟຕາມແຕ່ລະປ້ຳຈຳໜ່າຍແຕ່ລະໄລຍະ ແລະ ມີລົດກວດຄຸນນະພາບນ້ຳມັນເຊື້ອໄຟເຄື່ອນທີ່ໄວ້ບໍລິການຕາມ ຄວາມຮຽກຮ້ອງຂອງປະ ຊາຊົນ ແລະ ສາຍດ່ວນຈາກຜູ້ຊົມໃຊ້ 1513 ອີກດ້ວຍ,​ ທັງນີ້ກໍ່ເພື່ອການຄຸ້ມຄອງ ແລະ ກວດກາຄຸນນະພາບນ້ຳມັນເຊື້ອໄຟ ໃຫ້ໄດ້ຕາມມາດຖານ ເພື່ອຕອບສະໜອງ ຕາມຄວາມຮຽກຮ້ອງຕ້ອງການຂອງສັງຄົມ ໃນການແກ້ໄຂປະກົດການຫຍໍ້ທໍ້ ແລະ ປົກປ້ອງຜູ້ຊົມໃຊ້ນ້ຳມັນໃຫ້ມີຄຸນນະພາບຖືກຕ້ອງຕາມມາດຖານແຫ່ງຊາດກໍ່ຄືສາກົນ.