ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ລົງເຄື່ອນໄຫວ ແລະ ເຮັດວຽກຢູ່ແຂວງຄຳມ່ວນ

IMG 6997ໃນຕອນ​ແລງ​​ວັນທີ 15 ສິງຫາ 2016 ທີ່ຜ່ານ​ມາ ທ່ານ ສຈ.ດຣ ບໍ່ວຽງຄໍາ ວົງດາລາ ລັດຖະມົນຕີວ່າການກະ ຊວງວິທະຍາສາດ ແລະ ເຕັກໂນໂລຊີ ພ້ອມດ້ວຍຄະນະໄດ້​ເຂົ້າ​ພົບ ທ່ານ ​ໂອ​​ໄດ ສຸດາ​ພອນ ​ເລຂາ​ພັກ​ແຂວງ ​ເຈົ້າ​ແຂວງໆຄຳ​ມ່ວນ. ຈຸດປະສົງ​ຄື​ການ​ຊັບຊ້ອນ​ພະນັກງານ​ລົງ​ປະຈຳ​ຢູ່​ດ່ານ​ສາກົນ ຂອງ​ແຂວງ​ຄຳ​ມ່ວນ ​​ເພື່ອ​ກວດ​ສອບ​ຄຸນ​ນະພາ​ບນ້ຳມັນ​ເຊື້ອ​ໄຟ​ທີ່​ນຳ​ເຂົ້າ​ມາ​ຈາກ​ຕ່າງປະ​ເທດ​ທີ່​ຜ່ານ​ດ່ານ​ສາກົນ ຄື​: ດ່ານ​ສາກົນ​ຂົວ​ມິດຕະພາບ 3 ​ແລະ ດ່ານ​ຈໍ​ຫລໍ ​ແຕ່​ລະ​ບໍ​ລີ​ສັດທີ່ຂົນ​ສົ່ງ​ນ້ຳມັນ​ເຂົ້າ​ມາ​ຕ້ອງ​ໄດ້ຜ່ານການກວດ​ສອບ​ຄຸນ​ນະພາ​ບນ້ຳມັນ. ທ່ານ​ລັດຖະມົນຕີ​ຍັງ​ຍົກ​ໃຫ້​ເຫັນ 2 ​ແຂວງ​ທີ່​ໄດ້​ເປີດ​ການ​ນຳ​ໃຊ້​ດ່ານ​ກວດ​ສອບ​ນ້ຳມັນ​ເຊື້ອ​ໄຟຄື: ຂົ້ວ​ມິດຕະພາບ​ວຽງຈັນ-ໜອງຄາຍ ແລະ​ ດ່ານ ປາກ​ຊັນ ​ແຂວງ​ລີ​ຄຳ​ໄຊ ທີ່​ເປີດ​ໃຊ້​ເປັນ​ທາງ​ການ​ແລ້ວ.

​          ໃນ​ຕອນ​ແລງ​ຂອງ​ວັນ​ດັ່ງກ່າວທ່ານ ​ລັດຖະມົນຕີການກະຊວງວິທະຍາສາດ ແລະ ເຕັກໂນໂລຊີ ​ຍັງໄດ້​ເປັນ​ປະທານກອງ​ປະຊຸມ​ທີ່ຫ້ອງ​ປະຊຸມພະແນກວິທະຍາສາດ ແລະ ເຕັກໂນໂລຊີແຂວງ ຄຳ​ມ່ວນ ​ໂດຍ​ມີ​ບັນດາ​ ຫົວໜ້າ​ກົມ, ຮອງ​ກົມ, ຫົວໜ້າ​ພະ​ແນ​ກ, ຮອງ​ພະ​ແນ​ກ, ຫົວໜ້າຂະ​ແໜງ, ຮອງ​ຂະ​ແໜງ, ພະນັກງານ​ວິຊາ​ການ​ເຂົ້າ​ຮ່ວມ​ຢ່າງ​ພ້ອມພຽງ.

ທ່ານ ນາງ ໄພບູນ ໄຊຍະກຸມມານ ຫົວໜ້າພະແນກວິທະຍາສາດ ແລະ ເຕັກໂນໂລຊີແຂວງ​ ໄດ້​ຂຶ້ນ​ຜ່ານ​ບົດ​ລາຍ​ງານຂອງ ພະ​ແນ​ກວິທະຍາສາດ ແລະ ເຕັກໂນໂລຊີ ຕໍ່ລັດຖະມົນຕີ​ຮັບ​ຊາບໂດຍ​ຫຍໍ້​ຄື: ພະແນກວິທະຍາສາດ ແລະ ເຕັກໂນໂລຊີແຂວງ​ຄຳ​ມ່ວນ ມີ​ພະນັກງານ​ທັງໜົດ 24 ທ່ານ, ຍິງ 12 ທ່ານ, ມີສະມາຊິກ​ພັກ 12 ທ່ານ, ຍິງ 7 ທ່ານ, ມີ 4 ຂະ​ແໜງການຄື: ຂະ​ແໜງ​ຈັດຕັ້ງ-ບໍລິຫານ; ຂະແໜງຊັບສິນທາງປັນຍາ, ມາດຕະຖານ ແລະ ວັດແທກ; ຂະແໜງເຕັກໂນໂລຊີ ຂໍ້ມູນຂ່າວສານ; ຂະແໜງ ວິທະຍາສາດເຕັກໂນໂລຊີ ແລະ ນະວັດຕະກຳ; ມີ 7 ​ເມືອງ​ທີ່​ເປັນ​ຫ້ອງການ, ມີ 3 ​ເມືອງທີ່​ເປັນໜ່ວຍງານ​, ເມືອງ​ສາມ​ສ້າງ​ມີ 3 ​ເມືອງ ຄື: ​ເມືອງ ທ່າ​ແຂກ,  ​ເມືອງໜອງບົກ, ​ເມືອງ ບົວລະພາ.​ ​ໃນ​ຕອນ​ທ້າຍ​ກອງ​ປະຊຸມ​ທ່ານ​ລັດຖະມົນຕີ​ພ້ອມ​ຄະນະ​ຍັງ​ໄດ້​ມອບ​ຄອມ​ພິວ​ ເຕີ້ (hp) ​ຕັ້ງ​ໂຕະ 1 ຊຸດ​ໃຫ້​ກັບພະແນກວິທະຍາສາດ ແລະ ເຕັກໂນໂລຊີເພື່ອ​ຮັບ​ໃຊ້​ເຂົ້າ​ໃນໜ້າທີ່ການຈັດ​ຕັ້ງ​ປະຕິບັດ​ວຽກງານ ​ແລະ ນຳ​ໃຊ້​ເຂົ້າ​ໃນ​ການຈັດ​ຕັ້ງ​ບໍ​ລິ​ຫານ​ດ້ານ​ວຽກງານ​ອື່ນໆຂອງ​ຫ້ອງການ​ ໃຫ້​ມີ​ຄວາມ​ສະດວກ​​ແລະ ​ແທດ​ເໝາະກັບໜ້າທີ່​ວຽກງານ​ຕົວ​ຈິງ. ໃນ​ຕອນ​ເຊົ້າ​ຂອງ​ວັນ​ທີ 16 ສິງຫາ 2016 ທ່ານລັດຖະມົນຕີ​ຍັງໄດ້​ໃຫ້​ກຽດ​ເປັນ​ປະທານ​ກອງ​ປະຊຸມ​ ທີ່ຫ້ອງ​ປະຊຸມ​ດ່ານສາກົນ​ຂົວ​ມິດຕະພາບ 3 ພ້ອມ​ຄະນະ ​ແລະ ມີຫົວໜ້າພະແນກວິທະຍາສາດ ແລະ ເຕັກໂນໂລຊີແຂວງ​,​ ຫົວໜ້າດ່ານ, ຫົວໜ້າທຸລະ​ກິດ​​ ແລະ ພະນັກງານ​ວິຊາ​ການທີ​ກ່ຽວຂ້ອງ​ຈຳນວນໜຶ່ງ​ເຂົ້າ​ຮ່ວມ ​ເພື່ອ​ປຶກສາ​ຫາລື​ການ​ກະກຽມສະຖານ​ທີ່ຫ້ອງການ​ຂອງ​ພະນັກງານ​ທີ່​ຈະ​ມາປະຈຳການ​ທີ່​ດ່ານ ​ໃນ​ການ​ກວດ​ສອບຄຸນ​ນະພາ​ບນ້ຳມັນ​ເຊື້ອ​ໄຟ ທ່ານ ສີ​ລີ​ວັນ ຫົວໜ້າດ່ານ​ສາກົນ​ຂົວ​ມິດຕະພາບ 3 ​ໄດ້​ລາຍ​ງານ​ໂດຍ​ຫຍໍ້​ກ່ຽວກັບ​ການ​ນຳ​ເຂົ້າຂອງ​ສິນຄ້າ​ທີ່​ຜ່ານ​ດ່ານ​ມາ​ ຈາກ​ຕ່າງປະ​ເທດ​ມີ​ທັງ​ຄວາມ​ຫຍຸ້ງຍາກ ​ແລະ​ ຄວາມ​ສະດວກ​ໂດຍ​ສະ​ເພາະ​ນ້ຳມັນ​ເຊື້ອ​ໄຟ​ທີ່ຜ່ານ​ດ່ານ​ດັ່ງກ່າວ​ມີ 8 ບໍລິ​ສັດ. ອາທິດໜຶ່ງຈະ​ມີ 2 ​ວັນຄື ​ວັນ​ຈັນ ​ແລະ ວັນ​ພະຫັດ. ຫຼັງຈາກ​ປຶກສາ​ຫາລື​​ສຳ​ເລັດ​ແລ້ວ​ທັງ​ສອງ​ຝ່າຍ​ກໍ່​ໄດ້​ລົງ​ກວດ​ເບິ່ງ​ ສະຖານ​ທີ​່ຕົວ​ຈິ່ງ​ຕາມ​ຄວາມເໜາະສົມ​ ​ແລະ ເຫັນ​ດີ​ທັງ​ສອງ​ຝ່າຍ.